Израел ја започна копнената офанзива во Газа – жителите масовно ја напуштаат територијата

Израелските одбранбени сили потврдија дека започнале со првични операции кои се дел од долгорочно планираната копнена офанзива за преземање на градот Газа. Според официјалните информации, израелските војници веќе воспоставиле контрола врз делови од периферијата на градот, вклучувајќи ги областите Зејтун и Џабалија.

Портпаролот на армијата изјави дека акциите претставуваат подготвителна фаза за целосно освојување на градот, план кој вчера го одобри министерот за одбрана Израел Кац, а оваа недела треба да биде претставен и пред безбедносниот кабинет на израелската влада. За оваа операција во септември беа мобилизирани околу 60.000 резервисти за да го поддржат активниот воен персонал.

Од друга страна, Хамас го обвини Израел дека намерно го блокира постигнувањето договор за прекин на огнот, со цел да продолжи, како што велат, „брутална војна против цивилното население“. Во нивната реакција се наведува дека Тел Авив го игнорирал најновиот предлог на медијаторите за ослободување на заложниците и дека премиерот Бенјамин Нетанјаху е „главната пречка за било каков договор“.

Палестинските медиуми јавуваат дека жителите на Газа веќе масовно ја напуштаат својата територија, стравувајќи од голема офанзива. Очекувањата се дека стотици илјади луѓе ќе добијат наредба да се евакуираат кон јужниот дел на Појасот Газа, каде се подготвуваат привремени засолништа.

Планот на Израел предизвика осуда и кај неговите сојузници. Францускиот претседател Емануел Макрон предупреди дека ваквиот потег може да доведе до „катастрофални последици за двете страни и да ја вовлече целата регија во нов циклус на војување“.

Меѓународниот комитет на Црвениот крст, пак, соопшти дека новите раселувања и засилувањето на борбите ќе ја влошат веќе тешката хуманитарна состојба на 2,1 милиони жители на Појасот Газа.

Израелската влада уште минатиот месец ја објави намерата да го стави под целосна контрола целиот Појас Газа, откако пропаднаа индиректните преговори со Хамас за прекин на огнот и размена на заложници.