Кошта: Иднината на Македонија е во ЕУ

Претседателот на Европскиот совет, Антонио Кошта, денешната средба со премиерот Христијан Мицкоски ја оцени како долга, но многу конструктивна. Кошта изрази цврсто убедување дека проширувањето е заедничка цел и најдобра геостратешка инвестиција во мир, стабилност и безбедност.

Тој ја поздрави работата на македонската Влада во однос на реформската агенда и постигнатиот напредок, нагласувајќи ја важноста од искористување на можноста за стратешки инвестиции како Коридорите 8 и 10. Кошта повтори дека иднината на Македонија е во Европската Унија, посочувајќи дека е постигнато многу и се разговарало за преостанатите чекори.

-Јас цврсто верувам дека проширувањето е заедничка цел која ја споделуваме и ова е најдобрата геостратешка инвестиција во мир, стабилност и безбедност што сите можеме да ја направиме. Ја поздравувам одличната работа која што беше завршена од страна на Македонија, од вашата Влада во поглед на реформската агенда и напредокот кој беше постигнат. Мораме да ја искористиме оваа можност да направиме стратешка инвестиција, да ја завршиме, како што се Коридорите 8 и 10. Во текот на нашата средба јас повторив дека иднината на Македонија е во Европската Унија. Постигнавме поприлично многу досега и дискутиравме за преостанатите чекори кои треба да бидат превземени за да се заврши овој процес, рече Кошта.