Путин: Имаме најнапредна нуклеарна тријада во светот

Рускиот претседател Владимир Путин синоќа изјави дека новата програма за вооружување за периодот од 2027 до 2036 година треба да посвети посебно внимание на нуклеарната тријада, односно на копнените, морските и воздушните нуклеарни сили.

Коментарите на Путин, емитувани на државната телевизија, беа дадени на состанок на високи функционери посветен на руската воена индустрија и подготовките за следната долгорочна програма за вооружување.

„Несомнено е дека мора да се посвети посебно внимание на нуклеарната тријада, која била и ќе остане гаранција за рускиот суверенитет и игра клучна улога во одржувањето на рамнотежата на моќта во светот“, рече Путин.

Што е нуклеарна тријада?

Нуклеарната тријада е термин што се однесува на трите начини на лансирање ракети - од копно, од воздух и од море - што ги имаат на располагање сите големи нуклеарни сили. Путин тврдеше дека Русија е пред другите земји во овој поглед.

- Во моментов, уделот на модерно оружје и опрема во стратешките нуклеарни сили е веќе 95 проценти. Ова е силен индикатор, всушност највисок меѓу сите нуклеарни сили во светот - рече рускиот претседател.

Тој додаде дека новата програма мора да вклучува и развој на напредни системи, земајќи го предвид искуството од, како што рече, „специјалната воена операција“, што е официјалното име на Русија за војната против Украина, но и од други регионални конфликти и глобални трендови во развојот на воената технологија.

Итно засилување на копнените сили

Покрај нуклеарната тријада, Путин ја нагласи потребата од итно засилување на копнените сили, нарекувајќи ги „доминантна сила во спроведувањето на современи воени операции од кој било обем и интензитет“: „Важно е што поскоро да се зголеми нивната борбена способност“.

Во својот говор, Путин го истакна и растот на воените трошоци, кои, според државните медиуми, достигнаа 6,3 проценти од рускиот БДП - највисоко ниво од Студената војна.

Војната во Украина трае од февруари 2022 година, кога Русија започна тотална инвазија. Но, руската агресија против Украина започна во 2014 година, кога Крим беше анексиран, а проруските сили презедоа делови од Донбас. Во текот на војната, Русија редовно таргетираше цивилна инфраструктура. Во вторник, на 11 јуни, во руски напад со беспилотни летала врз Харков загинаа најмалку три лица, а 64 беа ранети.