Турција: 48 лица уапсени за корупција, меѓу нив и градоначалник

Турски обвинител нареди апсење на 48 осомничени, вклучувајќи го и градоначалникот на опозицискиот округ Бајрампаша во Истанбул, како дел од истрагата за корупција, објави денес ТРТ Хабер.

Полицијата изврши рации на 72 локации во раните утрински часови за да заплени документи и да уапси осомничени под обвинение за проневера, поткуп и местење на понуди, објави Ројтерс.

Градоначалникот на Бајрампаша, Хасан Мутлу, од главната опозициска Републиканска народна партија (ЦХП), изјави на платформата X дека нема што да крие и ја нарече истрагата „политичка операција заснована на неосновани клевети“.

Пресудата, која се очекува во понеделник, може да доведе до отстранување на лидерот на ЦХП во процес што се смета за тест за кревката рамнотежа помеѓу демократските институции и централизираната власт во земјата, дополнително зголемувајќи го правниот притисок врз партијата, соопшти агенцијата.