Дали добивте порака од Сузи: хакиран телефонот на шефицата на кабинетот на Белата куќа

Едно или повеќе непознати лица пристапиле до личниот мобилен телефон на шефицата на кабинетот на Белата куќа, Сузи Вајлс, и го користеле нејзиниот телефонски именик за да контактираат со високи американски функционери и да се претстават како неа, потврдија извори за „CBS News“.

Некои од примателите на повиците и пораките препознале дека нешто не е во ред бидејќи повиците и пораките доаѓале од непознат број, а лице кое се претставувало како Сузи Вајлс побарало комуникацијата да продолжи на друга платформа – како што е Телеграм, велат изворите.

Во извештајот се вели дека Вајлс им кажала на колегите дека некои од нејзините контакти на мобилниот телефон биле хакирани, дозволувајќи му на лажниот човек да пристапи до приватни телефонски броеви, објави „Ројтерс“.

Инцидентот влијаел на нејзиниот личен телефон, а не на нејзиниот владин телефон, се наведува во извештајот.

„Волстрит журнал“ објави дека во последните недели, сенатори, гувернери, врвни американски бизнисмени и други личности добиле пораки и повици од лице кое тврди дека е Вајлс, повикувајќи се на луѓе запознаени со пораките.

Белата куќа и Федералното истражно биро (ФБИ) не одговорија веднаш на барањата за коментар.