По повеќе од четири години, лекарски уверенија ќе се издаваат во дебарската болница

По повеќе од четири години, од 4 јули во Општата болница со проширена дејност во Дебар, ќе почне да функционира Комисијата за издавање лекарски уверенија за возачи.

-На задоволство на граѓаните можам да соопштам дека по повеќе од 5 месеци интензивни активности, во Дебар повторно ќе функционира Комисијата за лекарски уверенија за возачи. Оваа комисија беше многу важна за сите, а се враќа по повеќе од 4 години, при тоа исполнувајќи ги сите барања на Министерството за здравство за доделување на оваа дозвола, нагласи во изјава за МИА директорот на болницата, Мерсим Колеци.

Комисијата ќе заседава еднаш неделно и веќе од овој петок во 9 часот сите заинтересирани  можат да се дојдат во просториите на болницата за да ги извршат потребните прегледи.

-Јас лично ја презедов обврската дека, ќе го направам невозможното за да ја постигнам целта, и успеав. Покрај другото, обезбедивме кадар кој ни недостигаше, специјалисти по ОРЛ и психијатар од Струга, невролог од „Дебарски Бањи-Цапа", додека другиот кадар е од нашата болница, рече тој.

Ваквата вест ја поздравуваат жителите не само од Дебар туку и од соседните општини, кои досега за лекарско уверение мораа да патуваат до Струга или други градови.