Политико: Белата куќа планира средба меѓу Путин и Зеленски во Будимпешта

Трилатерален состанок Трамп - Путин - Зеленски во унгарската престолнина Будимпешта. Ова е едното од можните исходи откако американскиот претседател прво го прими својот руски колега на состанок во Аљаска, а потоа и украинскиот во Вашингтон.

Политико повикувајќи се на изјава од функционер во трамповата администрација објави дека Белата куќа размислува за вакво сценарио.

Тајната служба на САД веќе го подготвува теренот за потенцијален самит во централноевропската земја предводен од премиерот Виктор Орбан, долгогодишен сојузник на Трамп уште од неговиот прв мандат.

Портпаролката на Белата куќа не го коментираше извештајот, ниту пак даде детали за потенцијалниот состанок на денешниот брифинг.

Иако Тајната служба често разгледува повеќе можни локации и конечна одлука за локацијата на состанокот сè уште не е донесена, Будимпешта сè повеќе се појавува како прв избор на Белата куќа, според два извори запознаени со приватните разговори.

Путин наводно му рекол на Трамп дека ја претпочита Москва, додека францускиот претседател Емануел Макрон се залагал за Женева како идеална локација. За да не биде заостанат, швајцарскиот министер за надворешни работи му понудил на Путин „имунитет“ од постоечката потерница за воени злосторства доколку Швајцарија - позната по својата неутралност - биде избрана да биде домаќин на разговорите.