Се подготвува најголема аукција на фустани од принцезата Дајана

Облека што ја носела принцезата Дајана ќе биде понудена на аукција на крајот од месецот во Лос Анџелес. Тоа е најголемата аукција на нејзини модни парчиња.

Фустаните, шеширите, чантите и чевлите на принцезата Дајана ќе бидат понудени на аукцијата наречена „Стилот на принцезата Дајана и кралската колекција“. Меѓу најзначајните предмети е свилен цветен фустан од 1988 година од модната куќа Belleville Season, позната како „фустан за нега“ бидејќи Дајана го носела неколку пати за време на посетите во болница.

Исто така, постои и кремаст свилен вечерен фустан со вез, дизајниран од Кетрин Вокер за турнејата на Дајана во Заливот во 1986 година, како и жолто цветно одело, дизајнирано од Брус Олдфилд, што Дајана го носеше на Кралскиот Аскот во 1987 година. Проценетата вредност на овие фустани е помеѓу 100.000 и 300.000 долари.

-Ова е најголемата аукција посветена на принцезата Дајана. Имаме повеќе од 100 предмети од нејзиниот неверојатен живот и кариера. Треба да се запомни дека самата Дајана продала повеќе од 70 од своите фустани во 1997 година за да собере пари за хуманитарни цели, рече Мартин Нолан, директор и ко-основач на аукциската куќа.

Други предмети вклучуваат чанта Диор, подарок од поранешната прва дама на Франција Бернадет Ширак во 1995 година, скица од венчаницата на Дајана од 1981 година со украси од тил од нејзината свадба со принцот Чарлс и шапка што ја носела на медениот месец.

„Луѓето сега ги гледаат овие предмети како еден вид инвестиција, бидејќи ако ги купат сега, постои голема веројатност да ги продадат за повеќе отколку што платиле за нив на аукција за неколку години“, рече Нолан.

Дел од приходите од предметите на Дајана ќе бидат донирани на добротворната организација за мускулна дистрофија, а аукцијата е закажана за 26 јуни.