12-годишно момче загина во полициска потера во Брисел

12-годишно момче почина во Брисел откако беше удрено од полициско возило за време на полициска потера. Белгиското јавно обвинителство соопшти дека момчето се обидело да избега кога полицајците се обиделе да го сопрат на електричен тротинет. Полицијата тргнала по момчето, но инцидентот завршил трагично во блискиот парк.Според белгиската новинска агенција Белга, детето било удрено од полициско возило додека бегало. Брза помош го реанимирала и го однела во болница, но повредите биле премногу сериозни и починал подоцна во текот на денот.

Околностите на несреќата сè уште не се разјаснети. Јавното обвинителство започнало истрага, а вклучена е и специјална полициска единица. Според Белга, полицијата официјално не го коментирала случајот и сè го проследила до обвинителството.