Ковачки: Заев ја злоупотребуваше моќта на извршната и законодавната власт врз судската власт

Изминатиот период имавме директно мешање на извршната власт во судската власт, на деновиве во интервјуа гледаме дека дури имало и нарачување на обвиненија од страна на тогашниот премиер Зоран Заев и давал насоки како тоа да изгледа, истакна пратеникот Драган Ковачки во „Наткаст“ со Љупчо Цветановски на Курир.мк.

Ковачки потсети и дека Заев од митинзи објавувал судски пресуди за одредени политички прогони, кои како што рече, ги правела неговата партија.

-Заев ја злоупотребуваше моќта на извршната и законодавната власт врз судската власт. Во тој период, кога тие беа на власт, имавме пресуди кои се базираа на сомнителни докази, некаде пресуди и без докази, но и со подметнати докази и за тоа има факти. Ова е поразително за една држава. Потрагата по правдата мора да биде еден континуиран процес на барање на рамнотежа помеѓу потребите на поединецот и потребите на општеството притоа штитејќи ги човековите права, а сето тоа да биде врз основа на Уставот и законите, истакнува Ковачки.

Во однос на трагедијата во Кочани, пратеникот вели дека сега Обвинителството е оставено да ја води истрагата без притисок од извршната или законодавната власт, односно без мешање на политиката.